Depeï tchoques dizeunes d'anneïs, y a zaeu du progreus d'fait su lés vouétures. Dans l'temps tu la deumarré caté une maniveule et "hop, rouleu jeunesse". Lés supensouères feusint "tchouic-tchouic", l'aveurtissouère feusé" Poueut-Poueut", le tuïau d'échappouère peuteu comme si la djerre té deuclareï, y aveu pas d'clignotoué, fallé mette le bras.
Astour, ça a bin changeu!
La nouvelle vouéture à José a tous lés acceussoières du monde moderne.
José i peuse su un bouton et son autoou s'ouveurt tout soule, i s'installe, i peuse su un aoute bouton, ô deumarre toute soule, sauf... sauf quand Josè a baeu un coup d' trop, la vouéture li caouse et ô li dit: "t'é bézé mon lipaou, t'as la goule pieune de vin rouge, t'as qu'à te r'poseu, je n'deumarr'ré pas!"
C'é l'nouviaou systeume de sétchuriteu pour iaeux qui beuvent. Ah, ô lé bin étchipeu sa bouzine et pis y en a dés ch'vaoux sous l'capoou (et i n'en broutent de l'aveune, du supeur). Quand José ét installeu dans sa vouéture, il é coume un rouè et il é fieur... si vous l'crouésé su la route, i n'vous r'connétra même pas!
Vous, vous l'reconnétré bin, son autoou é coume un oeuf de Pâques, ô n'fait ni "tchouic-tchouic ni poueut-poueut", ô n'peute pas et ô n'fait pas de fumeï naïre.
Si vous l'veuyez, souheutez li l'bonjou d'ma part!